საინვესტიციო წინადადების მიზანია მაღალხარისხოვანი მცირე ზომის მსუბუქი თბოსაიზოლაციო საკედლე ბლოკების და მსუბუქი შემავსებლების თანამედროვე საწარმოს შექმნა საქართველოსა და მიმდებარე ქვეყნების სამშენებლო ინდუსტრიის მოთხოვნათა დასაკმაყოფილებლად.

ენერგომატარებლებზე ფასების არნახულმა ზრდამ დღის წესრიგში დააყენა შენობების დათბუნების საკითხი, რაც მაღალხარისხოვანი და , ამავე დროს, იაფფასიანი მსუბუქი თბოსაიზოლაციო მასალების წარმოების აუცილებლობას ქმნის. ამ მიზნით აღსანიშნავია მდ. დურუჯის ჩამონაშალი თიხა–ფიქლების გამოყენების პერსპექტივები, რომლებსაც გააჩნიათ თვითაფუების უნარი გარკვეული ტემპერატურული რეჟიმის პირობებში.უნდა აღინიშნოს, რომ მდ. დურუჯს ყოველწლიურად ღვარცოფების შედეგად ჩამოაქვს დაახლოებით 500 ათასი ტ. ნაშალი თიხა–ფიქლები, რომელიც ეკოლოგიური კატასტროფით ემუქრება მიმდებარე ტერიტორიას, განსაკუთრებით ქ. ყვარელს. ამიტომ, ერთი მხრივ, თიხა–ფიქლების ათვისება ხელს შეუწყობს ამ პრობლემის დაძლევას, ხოლო მეორე მხრივ, გვექნება იაფი სანედლეულო ბაზა ახალი თბოსაიზოლაციო მასალების საწარმოებლად, რომლის თვითღირებულებაც  გაცილებით  დაბალია ვიდრე სარეალიზაციო ფასი.

 

ლაბორატორიულ პირობებში მიღებულია ერთგვაროვანი სტრუქტურის მქონე მასალა, რომლის საექსპლოატაციო პარამეტრებია: მოცულობითი მასა – 300–650 კგ/მ3, სიმტკიცის ზღვარი კუმშვისას – 0,6–2,5 მგპა, წყალშთანთქმა – 3,5–7%, ფორიანობა – 60–80%.

მსუბუქი თბოსაიზოლაციო მცირე ბლოკების ქარხანა სავარაუდოდ უნდა აშენდეს ყვარლის რაიონში, სანედლეულო ბაზის სიახლოვეს. ბლოკების ჩამონახერხი ნარჩენები კი ფოროვანი შემავსებლის სახით გამოყენებულ იქნება, როგორც მსუბუქი ბეტონების დასამზადებლად, ასევე ნაყარი სახით იატაკის და სართულშორის გადახურვებში. ამრიგად, წარმოება იქნება უნარჩენო.

პროდუქციის ძირითადი მომხმარებლები იქნებიან საქართველოსა და კავკასიის ქვეყნების სამშენებლო ფირმები.

ლამარა გაბუნია, ტექნიკის მეცნიერებეთა დოქტორი